Hey Franze, grüaß de! Wia geht’s, wia steht’s? Wos sogst? No ja – zu unserer Sepperl? Jetzt tua ned so, du woaßt scho wen i moan, s’Joseferl! Wos moanst? Da sagt ma ned Sepperl? Ja aber zum Josef sogt ma doch aa Sepp! Na oiso!
Du moanst, weil sie a Weiberleit is, sogt ma ned Sepp? Is ja guat – wia tat’s denn dann du sog’n? „Seferl“ – oiso i woaß ned, scho a bisserl sehr romantisch, des is ja eher a Nama für a Elfe. „Sie is ja a Elfe?“ Wia kimmst denn do drauf? Z’wengs ihre supergebleichten Haar? A so, weil a so schee singt. I glaab des is a G’macksach!
Sie is a Zeichen für a neie Entwicklung im Woid!
I find ja ned ihr’n Gesang bemerkenswert – des hoaßt eigentlich ja scho, aber des waar jetzt beleidigend. Wos mi fasziniert, is wos anders: Sie is a Zeichen für a neie Entwicklung im Woid! Ja, freilich, a Entwicklung, dass de Weiberleit bei uns sich auf d’Füaß g’macht hamm, dass sie sich emanzipiert hamm. Wos moanst? Oiso i find scho. Schau, Früher da san doch nur de Männer auße in die Fremde – und hamm da draußen ehaner Geld verdient. De Weiberleit san dahoam blieb’n und hamm do nach dem Rechten g’schaugt: Dass de Kinder versorgt werd’n, dass des Vieh versorgt werd, dass der Hof versorgt werd, dass der Mo versorgt werd, wenn er am Wochenend hoam kimmt – ja – des draht se jetzt langsam um! Heit muaß da Mo aufpassen, dass er no dakennt wird!
Schaug, mia Mannsbilder werd’n oiwei dünnhäutiger – so dünn, bis wir uns selber gar nimmer sehg’n, ja no ned amoi im Spiegel beim Rasieren! Des is übertrieb’n sogst du? Des is ned übertrieb’n! Warum hamm denn so vui an Bart? I woaß scho, des is a Dreitagebart, aber sie stutzen eahm ja oiwei am vierten Tag, wenn’s hoam kemma von da Arbat in der Fremde…! Wos i überhaupts sog’n wui?
Schaug – des Joseferl! Des is a ganz a neie Rass bei uns im Woid! A Exportschlager quasi, des is de neie Bayerwoidfrau. Ned bloß, weil sie singt, naa, des dean andere aa. Sie hod an eigenen Kanal bei YouTube, freile – wenn ich’s dir sog. Sie hod sogar fast zwoahundert Abonnenten – jetzt tua ned so, wie vui hast denn du? Da brauchst ned glei ei’gschnappt sei, bei uns Mannsbilder kummt’s auf wos anders o – freilich, da brauchst dir nix denka!
Oane, de bloß singt, de brauchand sie ned?
Aber stell dir vor: Da geht sie nach Bremen, deckt do an richtigen Saustall auf – wos? Den hat da Weise scho g’wußt vor a paar Jahr? Du moanst des war ned sehr weise von eahm dass er des ned alle g’sagt hod? Des stimmt, des war wirklich ned sehr weise von eahm, aber des Joseferl hat sogar an Brief g’schrieb’n an den Mayer: 99 Seiten – mei Liaber – des is fei an Haufa Zeig und er hod’s ned amoi g’lesen… Du moanst sie hat eahm aus Versehen ihra Musik-CD g’schickt… oiso des is jetzt aber g’schert!
I find die Texte von ihre Liader sehr gut, weil „sie a Herz hat wia a Bergwerk mog i sie!“
Der Text is aa ned von ihr? Ja moanst des woaß i ned, i bin doch ned bläd – aber bei ihr stimmt’s, de traut se wos. Wos? Des woaß i scho – i konn aa Zeitung les’n, des war schon lang bekannt, schon bevor sie nach Bremen g’anga is – des woaß i scho. Aber dass es jetzt olle wiss’n und dass ma überall drüber schreibt und redt – des verdank ma ihr!
Warum redest du mir die ganze Zeit dagegen – Wos? De Kollnburger hamm sich beschwert, weil sie koa Bürgermeisterin mehr hamm? Oane, de bloß singt, de brauchand sie ned? Oane, de in Bremen sitzt und 99 Seiten schreibt aber nix für Kollnburg tuat – de woll’n sie ned? Sie mächert bloß in die Zeitung eine und dass ma über sie redt?
Kollnburg: Wunderschön gelegen am Fuße des Pröller
Oiso i find des wahnsinnig undankbar – wer hod denn vor unserem Joseferl scho g’wußt wo Kollnburg is? Wunderschön gelegen am Fuße des Pröller?
A Jeder – der a Ahnung hod – von wos Schönem – immerhin a Aushängeschild für Waidler Gastlichkeit -, die ihresgleichen sucht. I sog bloß: de Kollnburg, a richtige Burg, gebaut im Jahr 1153. Des hast du ned g’wußt, gell. Des ist dir wurscht? Woaßt wos? Jetzt konnst mi gern hamm, jetzt mog i nimmer – du Grantscherb’m…
Pfüatdigodservusbisboid
Dei Xaverl